Utviding av Hellefossen kraftverk
NVE gjev Hellefoss Kraft AS løyve til å utvide Hellefossen kraftverk i Drammenselva i Øvre Eiker kommune i Buskerud.
Denne artikkelen er over ti år gammel.
Ved utvidinga vil kraftverkets årlege produksjon auke med 18 GWh, noko som svarar til straumbruken til rundt 900 husstandar.
Hellefoss Kraft AS har søkt om løyve til å utvide Hellefossen kraftverk i Øvre Eiker kommune. Den austre kraftstasjonsbygningen er planlagt utvida med eit eller to aggregat med ein samla installert effekt på 5 MW, som vil gje ein auke i årleg produksjon på 18 GWh. Utbygginga vil nytte det frå før utbygde fallet i Hellefossen. Delar av vatnet skal førast i ein ny inntakskanal til den austlege kraftstasjonsbygningen.
Tiltaket ligg i eit område prega av kraftutbygging og industriverksemd. I elva er det eit omfattande fritidsfiske etter laks. Det har vore eit tilbakevendande problem med stranding av yngel og småfisk ved tilfeller av utfall i kraftverket eller linjenettet. NVE meiner at med den omsøkte utvidinga vil forholda for fisk og andre vannlevande organismar kunne bli betre enn i dag. NVE meiner også at med god planlegging og oppfølging av anlegget i byggetida, vil skadeverknadane for landskap og miljø vere akseptable. NVE vurderer at fordelane av tiltaket i høve til dei ålmenne og private interessene er større enn skadane og ulempene ved å utvide kraftverket, og gjev difor løyve til utvidinga av Hellefossen kraftverk på fastsette vilkår.
