Anbod ute på ny veg-etappe i Hardanger

Dette gjeld siste etappe mellom Bugjelet og Hardangerbru-prosjektet på Bu, ei vegstrekning på 1 900 meter. Det skal byggjast gang- og sykkelveg og tre landbruks-undergangar, samt ein støyvoll på 170 meters lengde.

Omsyn til bruopning
Det blir anbodskonferanse 24. januar, og entreprenørane har frist til 29. februar med å levera anbod. Statens vegvesen reknar med byggjestart i løpet av våren, og prosjektet skal vera ferdig 1. oktober 2013. Med opninga av Hardangerbrua sommaren 2013 i tankane, er det sett ein delfrist til 29. april 2013 med fullføring av 75 prosent av asfaltert veg på strekninga.

Djup myr
Prosjektet Bu–Brimnes er rassikring og utbetring av dagens rv. 13. Rasfaren er passert når byggjesteg 2 blir ferdig i løpet av 2012. Strekninga mellom Bugjelet og fram mot Butunnelen til Hardangerbrua går gjennom skogs- og myrterreng. Kring 15 000 kubikk med myrmassar på opptil 12 meters djupne må skiftast ut med nye steinmassar. Det vil periodevis bli omlegging av dagens rv. 13 under anleggsperioden.

Trafikantane må venta seg vegstenging inntil ein halv time om gongen på morgon og ettermiddag, og elles inntil ein time.

Finansiering
Det var 28. november 2011 at Samferdsledepartementet stadfesta finansieringsopplegget for byggjesteg 3. Bruselskapet Hardangerbrua AS får høve til å forskottera inntil 77 mill. kroner til prosjektet, med tilbakebetaling til selskapet i perioden 2014–2017.