Foto: Tobias Berteig/Forsvaret
Vil gi 50 millionar til opprusting av fylkesvegbruer som er kritiske for militær mobilitet
– Transportsystemet skal støtte opp under militære behov for forflytting av både personell og materiell. Ved å opprette ei ny tilskotsordning til militær mobilitet vil regjeringa sikre at fylkeskommunane blir sette i stand til å ruste opp bruer på fylkesvegnettet som er kritiske for militær transport, seier samferdselsminister Jon-Ivar Nygård i ei melding.
Regjeringa
foreslår å løyve 50 millionar kroner til ei ny tilskotsordning til
fylkeskommunane over Samferdselsdepartementets budsjett i 2025.
Ordninga
er øyremerkt til å ruste opp 14 identifiserte bruer på fylkesvegnettet som er
kritiske for militær mobilitet i fylkeskommunane Akershus, Innlandet,
Trøndelag, Troms og Vestland. Dei 14 bruene blei identifisert i arbeidet med
Nasjonal transportplan 2025–2036.
– Med
Sverige og Finland som nye NATO-medlemar blir Noreg viktigare som mottaks- og
transittområde for allierte styrkar. Dette stiller høge krav til mellom anna
vegar og bruer. Den nye tilskotsordninga for utvalte bruer på fylkesvegnettet
skal bidra til å tilpasse transportsektoren til ein ny tryggingspolitisk
kvardag, seier samferdselsministeren.
Fylkeskommunane
har ansvar for nødvendige tiltak på fylkesvegnettet.
– Den nye
tilskotsordninga set dei aktuelle fylkeskommunane i stand til å gjennomføre
tiltak på dei identifiserte bruene, meiner regjeringa.
– Tilskotsordninga
vil styrke forsvarsevna og samfunnstryggleiken, og ho kan inngå i
toprosentmålet til NATO. Tiltaket bidrar òg til å redusere
vedlikehaldsetterslepet på fylkesvegane, skriv departementet.
