Kontrakten på Lærdalstunnelen truleg klar før sommaren

I desember vart det klart at Statens vegvesen gjekk vidare med tre entreprenørar som var kvalifiserte til å gi tilbod på den omfattande tunneloppgraderinga av Lærdalstunnelen. 

Dette var AF Gruppen, OneCo Infra og arbeidsfellesskapet Skanska og Vassbakk & Stol. Også det seinare konkursramma Bertelsen & Garpestad søkte om prekvalifisering, men blei avvist på grunn av manglande kvalifikasjonar.

Forhandlingar

25. februar leverte dei tre entreprenørane sitt første tilbod. Prosjektleiar Susanne Svardal i Statens vegvesen fortel til Byggeindustrien at tida etter dette har vore brukt til å nøye gjennom gjennom tilboda, og hatt møte med entreprenørane veka etter påske.

– Vi gitt tilbakemelding til entreprenørane på tilboda deira, og på korleis dei ligg an samanlikna med konkurrentane. Oppgraderinga av Lærdalstunnelen er lyst ut som ein einingspriskontrakt, og i motsetnad til ein totalentreprise er det avgrensa moglegheiter for tilbydarane til å justere tilboda ved å endre på utføring eller gjennomføring. Her må dei i større grad forhalde seg til skildringane som er gitt i utlysinga av oppdraget, fortel ho.

Ingen kommentar

– Korleis ser tidsplanen ut for prosessen vidare? 

– Vi har sett fristen for dei endelege tilboda til 22. mai. Det betyr at vi ser føre oss å kunne signere kontrakt før sommarferien tek til, føreset at det ikkje kjem inn klager på avgjerda. Planen er at den valde entreprenøren skal kunne starte arbeida i september.

– Kva kan du seie om prisnivået på tilboda de fekk inn i første runde? 

– Det kan eg ikkje seie noko om. Vi held korta tett til valet av entreprenør er gjort.

– Men du kan vel kommentere om tilboda ligg innanfor forventa kostnadsramme for kontrakten? 

– Nei, er Susanne Svardal sitt korte svar.

Statens vegvesen har tidlegare opplyst at heile oppgraderinga av den 24,5 kilometer lange Lærdalstunnelen er kostnadsrekna til rundt 2,6 milliardar kroner, og at kontraktsverdien på den no utlyste hovudentreprisen er venta å liggje på rundt 1,5 milliardar kroner.

Omfattande arbeid

Cirka 100.000 kubikkmeter stein skal sprengjast ut i tunnelen, for å bygge nye havarilommer, snunisjar og nye tekniske bygg. 28 nye tekniske bygg skal på plass, to av desse ute i dagen. 

I tillegg skal det sprengjast ein ny ventilasjonstunnel ved sida av den gamle ut mot Tynjadalen, og nye sjaktventilatorar skal installerast.

Alt av teknisk utstyr skal skiftast ut og oppgraderast til å oppfylle dagens standard, og tunnelen får mellom anna 145 nye naudtelefoner installert. Eksisterande elktroteknisk anlegg skal vere i drift i heile anleggsperioden, og når det nye anlegget er testa og godkjent, skal det gamle koplast frå.

Heile oppgraderinga skal vere ferdig utført hausten 2029.

Heile oppgraderinga skal vere ferdig utført hausten 2029.